Dita e Theofanisë e rigjeti Katedralen Ortodokse të Tiranës të tejmbushur me besimtarë ortodoks, pas një periudhe 1 vjeçare që ata e patën të pamundur të festonin ditën e Ujit të Bekuar për shkak të masave kufizuese të pandemisë së COVID-19.
“Sot është një ditë e shënuar…pagëzimi i Jezu Krishtit. Në një ditë të tillë njeriu niset me shpresat më të mëdha”, i tha BIRN një burrë i moshuar duke ngritur duart drejt qiellit në shenjë besimi.
“Sigurisht, në rradhë të parë uroj shëndet për të tërë ne, por dëshira ime më e madhe është të shoh dhe nipërit e mbesat e mia të ardhshme të marrin pjesë në këtë ceremoni”, vijoi burri 75-vjeçar, i cili po mbushte me ujë të bekuar shishet e tij në rezervuarët e jashtëm të kishës.
Në shumë qytete të Shqipërisë si në Berat, Durrës, Fier dhe Pogradec kjo ditë festohet me hedhjen e kryqit në një hapësirë ujore si det, liqen apo lumë, ndjekur nga një grup të rinjsh të cilët notojnë për ta kapur atë.
Në Tiranë, kremtimi i kësaj date bëhet prej vitesh në Katedralen e Madhe në qëndër të kryeqytetit, në të cilën mbahet dhe një liturgji që zgjat pothuajse katër orë.
“Çfarë mund të urojmë në kohë të tilla. Shëndet, dhe vetëm shëndet”, u shprehën dy gra, të cilat prisnin të vinte rradha e tyre për të mbushur shishet e boshatisura që kishin përgatitur për ditën e sotme.
Hapësira e kishës u gjallërua dhe nga prania e fëmijëve të shumtë të cilët së bashku me prindërit dhe gjyshërit e tyre ndoqën me durim për katër ore Liturgjinë Hyjnore të së enjtes.
Mesazhi i kryepeshkopit Anastas për besimtarët ortodoks dhe gjithë qytetarët e Shqipërisë ishte urimi i tij për paqe, shenjtërim dhe bekim të tyre.
Ai u bëri thirrje besimtarëve që në këto kohë të vështira të kenë më shumë besim e më pak frikë.