Punëtorët e inceneratorit të Fierit protestuan të enjten në kërkim të pagave të prapambetura, pasi llogaritë e tyre mbetën bosh edhe pas premtimeve për shlyerjen e detyrimeve.
Rreth 25 punëtorë të kompanisë “Integrated Technology Waste Treatment Fier” bllokuan hyrjen e kamionëve me mbeturina në zonën e trajtimit të mbetjeve dhe paralajmëruan përshkallëzim të protestës, nëse nuk do të merrnin përgjigje konkrete për katër pagat e pashlyera.
“Na gënjyen prapë. Të mërkurën tha që do të na likujdojnë, ndërsa dje telefonat janë mbyllur,” tha njëri prej punëtorëve.
“Protesta do të vazhdojë derisa ata të likuidojnë rrogat,” shtoi ai.
Kompania koncesionare e inceneratorit të Fierit u sekuestrua nga Prokuroria e Posaçme, SPAK në mars të këtij viti, pas hetimeve të nisura për korrupsion dhe falsifikim dokumentesh. Më herët, SPAK sekuestroi edhe inceneratorin e Elbasanit, ndërsa hetimet vazhdojnë për projektin më të madh të inceneratorit të Tiranës.
Ish-ministri i Mjedisit, Lefter Koka, ish-deputeti socialist, Alqi Bllako si dhe zyrtarë të tjerë janë në arrest me akuzat e shpërdorimit të detyrës dhe korrupsionit, ndërsa administratorët Klodian Zoto dhe Stela Gugallja janë në arrati.
Pas sekuestrimit, kompania e inceneratorit të Fierit është marrë nën administrim nga Farudin Arapi për llogari të Agjencisë së Administrimit të Pasurive të Sekuestruara dhe Konfiskuara.
Arapi i tha BIRN se shlyerja e pagesave të punëtorëve është vonuar për shkak të ndryshimit të bankës ku do të depozitohen paratë.
“Është çështje bankash, nuk ka asnjë problem apo mungesë fondi, pagat do të shlyhen por janë vonuar për shkak të procedurave të bankave,” tha Arapi.
Arapi sqaroi gjithashtu se kompania dhe asetet e saj janë marrë në dorëzim para dy javësh, ndërsa punëtorët ishin lënë të papaguar më herët nga koncesionari.
“I ka lënë ish-koncesionari pa paguar, nuk i ka lënë shteti pa paguar,” tha Arapi. “Ne kemi marrë përsipër të paguajmë edhe ato detyrime të prapambetura, sepse janë familje të tëra që ushqehen me këto paga,” shtoi ai.
Nga ana tjetër, 25 punonjësit e inceneratorit kanë pak besim se shteti do t’i paguajë.
“Ata nuk e mbajtën fjalën dhe ne përsëri zgjodhëm protestën,” përfundoi punëtori.
