Gjykata e Posaçme për Korrupsionin dhe Krimin e Organizuar vendosi të enjten të shpallë fajtor ish-drejtorin e Radio -Televizionit Shqiptar, Thoma Gëllçi dhe ta dënojë atë me 2 vjet burg për veprën penale të “shpërdorimit të detyrës”. Në aplikim të gjykimit të shkurtuar, dënimi i Gëllçit u reduktua në 1 vit e 4 muaj heqje lirie.
Gëllçi u akuzua nga Prokuroria e Posaçme, SPAK për shkelje ligjore në një procedurë prokurimi për blerjen e pajisjeve për kanalin RTSH Agro. Ai u arrestua mbrëmjen e 8 dhjetorit 2021 dhe qëndron prej asaj kohe në paraburgim.
Tre të pandehurit e tjerë – anëtarët e Komisionit të Vlerësimit të Ofertave, Julian Tapia, Ervin Muraj dhe Alban Malaveci u dënuan me nga 1 vit burg secili.
Vendimi u mor nga trupi gjykues i kryesuar nga gjyqari Erjon Çela dhe me anëtarë gjyqtarët Irena Gjoka dhe Erjon Bani. Vendimi u kundërshtua nga përfaqësuesi ligjor i Gëllçit, Dorian Matlija, i cili paralajmëroi apelimin e çështjes.
“Qëndrimi ynë ka qenë që Thoma Gëllçi është i pafajshëm,” tha avokati Matlija, ndërsa shtoi se ish-kreu i RTSH-së nuk akuzohet për tenderin dhe as se ka përfituar diçka prej tij.
Matlija tha se e vetmja akuzë lidhet me një shtojcë kontrate, e cila sipas tij u lidh për shtyrjen e afatit të pagesës për shkak se fondet u lëvruan me një vit vonesë nga Ministria e Financave.
“Thoma Gëllçi u dënua pikërisht sepse guxoi të mbrojë financat publike,” tha Matlija, ndërsa shtoi se shtesa ishte bërë për të shmangur penalitetet për institucionin.
Përveç dënimit me burg, Gjykata e Posaçme vendosi t’i ndalojë Gëllçit dhe tre të zyrtarëve të tjerë të drejtën për të ushtruar funksione publike për 5 vjet.
