Tre ditë pas vdekjes tragjike të vajzës 7-vjeçare në plazhin e Potamit në Himarë, Gjykata e Vlorës e vlerësoi të ligjshëm arrestimin e ish-punonjësit të policisë, Arjan Tase dhe vendosi ndaj tij masën e “arrestit me burg”.
Në seancën e së premtes, prokurorja Elinda Laze ngriti akuzën e “vrasjes së kryer në formën e dashjes indirekte” ndaj Tases, i cili në momentin e krimit mbante detyrën e shefit të seksionit të Policimit në Komunitet në komisariatin e Elbasanit.
Shqipëria u trondit më 2 gusht nga vrasja e vogëlushes 7-vjeçare, e cila ndodhej në plazh së bashku me familjen e saj. Policia akuzoi Arjan Tasen se e goditi atë për vdekje, ndërsa po kryente manovra me një skaf në afërsi të bregut të detit.
Të premten, i akuzuari u paraqit i penduar në Gjykatën e Vlorës dhe i kërkoi ndjesë familjes së të miturës për tragjedinë e shkaktuar.
“Nuk doja kurrsesi të kishte ndodhur ajo që ndodhi. Nuk dua të mbrohem dhe nuk do të pretendoj asnjë rrethanë lehtësuese,” tha ai para gjykatës.
Tragjedia e 2 gushtit në plazhin e Potamit në Himarë u shoqërua me shkëmbim akuzash mes palëve politike, ndërkohë që qytetarët shqiptarë bëjnë thirrje për siguri dhe mbrojtje më të mirë të plazheve pas një sërë aksidentesh dhe fatkeqësish të ndodhura gjatë viteve të fundit.
Të enjten, mijëra qytetarë protestuan përpara Ministrisë së Brendshme dhe Kryeministrisë në Tiranë në shenjë revolte ndaj ngjarjes tragjike që i mori jetën vogëlushes 7-vjeçare.
