Një aksident në punë i ka marrë jetën një 56-vjeçari, punonjës i një gomisterie në Lezhë. Spase Milloshi ishte duke riparuar gomën e një makine të tonazhit të rëndë dhe gjatë punës rrethi prej hekuri i gomës është shkëputur duke e goditur 56-vjeçarin në kokë.
Policia njoftoi se ngjarja ndodhi rreth orës 8 e 30 minuta të mëngjesit të së premtes pranë një gomisterie në superstradën Lezhë-Milot, në afërsi të kryqëzimit të Spitënit.
Autoambulanca e Spitalit Rajonal të Lezhës mbërriti menjëherë në vendin e ngjarjes, por 56-vjeçari Milloshi u gjet pa shenja jete.
Policia bëri me dije se po hetonte për sqarimin e rrethanave të këtij incidenti të rëndë, që i mori jetën 56-vjeçarit Spase Milloshi. Ndërkohë Inspektorati Shtetëror i Punës njoftoi nisjen e hetimeve për të parë nëse janë respektuar rregullat e sigurisë.
Spasë Milloshi me banim në lagjen “Besëlidhja” të qytetit të Lezhës, punonte prej vitesh pranë kësaj gomisterie.
Siguria në punë është një problematikë e pazgjidhur në Shqipëri, ndërsa në 4 vitet e fundit sipas të dhënave të marra nga Inspektoriati i Punës 130 persona kanë humbur jetën pas aksidenteve në punë apo për shkak të punës.
