Paraditen e së mërkurës, organizata “Qëndresa Qytetare” zhvilloi një tryezë të rrumbullakët me studentë të universiteteve publike në vend.
Në këtë takim, përfaqësues të organizatës deklaruan se gjatë tri viteve të fundit, studentët nuk i marrin në kohë fondet e bursave meritore dhe sociale që ata duhet të përfitojnë. Këto fonde depozitohen në llogaritë e tyre me rreth katër apo pesë muaj vonesë.
“Inflacion i shtuar i këtyre kohëve dhe vonesat e bursave e bëjnë akoma më të vështirë situatën e studentëve,” tha Gevio Tabaku, analist i praktikave të arsimit pranë Qëndresës Qytetare.
Tabaku theksoi se bursat duhet të merren në fillim të muajit, sikurse ministrat dhe deputetët marrin pagat e tyre.
“Por përkundrazi, studentëve këto bursa u jepen katër-pesë muaj me vonesë,” shtoi ai.
Sipas gjetjeve të një pyetësori që organizata “Qëndresa Qytetare” ka kryer me studentët e universiteteve publike, 98% e studentëve nuk e kanë marrë fondin e bursës deri më 8 Janar 2023, datën e kryerjes së pyetësorit. Për studentët që regjistrohen gjatë raundit të parë të aplikimit universitar, pagesa e parë duhet të ishte depozituar brenda muajit nëntor 2022.
“Vlera monetare e këtyre bursave arrin deri në 10 mijë lekë të reja. Kjo nuk është një shumë e madhe, por arrin t’u mbulojë studentëve një pjesë të shpenzimeve të qirasë, librave apo shpenzimeve të tjera të jetesës,” shtoi Tabaku mbi domosdoshmërinë e këtij fondi në jetën studentore.
“Administratat këmbëshpejta të universiteteve janë të gatshmë për të bërë tendera që nuk lidhen me jetën studentore, por duket se janë të ngadaltë për të çuar paratë në llogaritë e studentëve,” theksoi Migen Qiraxhi nga Qëndresa Qytetare.
Sipas Gevio Tabakut, shkaku i vërtetë i këtyre vonesave është Qëndra e Shërbimit Arsimor (QSHA), por gjithashtu edhe mangësitë në VKM-në mbi procesin e aplikimit dhe përfitimit të bursave.
“Mospërcaktimi i afateve kohore për Qëndrën e Shërbimeve Arsimore në pikën e VKM-së krijon parregullsi dhe vonesa në shpërndarjen e fondeve,” shtoi ai.
Duke mos patur një afat kohor, QSHA nis procedurat e përfituesve të bursave kur e sheh vetë të arsyeshme.
“Dëshira dhe vullneti i kësaj qeverisje për të çuar paratë tek studentët është zero,” u shpreh Ina Zhupa, deputete e Partisë Demokratike dhe përfaqësuese në Komisionin e Edukimit në Kuvendin e Shqipërisë, e pranishme gjatë takimit.
“Shpenzimet studentore arrijnë deri në 4 mijë Euro në vit dhe aktualisht ato janë rritur akoma më shumë për shkak të inflacionit. Ndërsa qeveria ka marrë përsipër të mbulojë vetëm 900 Euro në vit vetëm për studentët me bursat sociale,” tha Zhupa gjatë fjalës së saj, duke nënkuptuar barrën e rëndë ekonomike për studentët shqiptarë.
