Policia e Lezhës njoftoi të hënën vdekjen e 50 vjeçarit Ndue Gjinaj si pasojë e një aksidenti të ndodhur në një fabrikë mielli në pronësi të tij në afërsi të fshatit Rrilë. Aksidenti me pasojë vdekjen ndodhi rreth orës 16:00.
Sipas njoftimit, 50 vjeçari Gjinaj ra nga një lartësi prej 3 metrash ndërsa ishte duke punuar në sistemimin e miellit dhe pësoi dëmtime të rënda në kokë. Ai u dërgua me urgjencë në Spitalin rajonal të Lezhës dhe pavarësisht ndërhyrjes së shpejtë të bluzave të bardha, nuk mundi t’u mbijetojë plagëve.
Policia tha se ka nisur hetimet për zbardhjen e rrethanave të aksidentit. Edhe Inspektoriati Shtetëror i Punës deklaroi se do të niste verifikimet për të parë zbatimin e rregullave të sigurisë në punë.
Ky është aksidenti i tretë në punë me pasojë vdekjen që ndodh brenda pak muajsh në qarkun e Lezhës. Në janar, një gomist nga fshati Spiten vdiq nga shpërthimi i një gome kamioni, të cilën po e riparonte, ndërsa në mars një mekanik humbi jetën në Kurbin si pasojë e një aksidenti tjetër në punë.
