Prokuroria e Posaçme njoftoi të mërkurën se në bashkëpunim me autoritetet maqedonase kishin arrestuar edhe 4 persona të tjerë të dyshuar si të përfshirë në tentativën për të trafikuar drejt Italisë 324 kilogramë e 400 gram lëndë narkotike të llojit kokainë.
Droga u kap në Portin e Durrësit më 18 qershor të vitit 2021, teksa Nazif Ajroski nga Maqedonia e Veriut po ngiste një kamion dhe po tentonte të kalonte nga Porti i Durrësit drejt Italisë.
Lënda narkotike e llojit kokainë u gjet në serbatorin e kamionit, paketuar në 300 pako të mbështjella me natriban.
Ajroski u dërgua për gjykim i akuzuar për veprat penale “Trafikimi i lëndëve narkotike”, “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal” dhe u dënua me 8 vite burgim.
SPAK vazhdoi hetimet në një procedim penal të ndarë dhe në bashkëpunim me autoritetet në Maqedoninë e Veriut identifikuan edhe 4 persona të tjerë të përfshirë në këtë veprimtari kriminale.
SPAK njoftoi se ata u arrestuan dy ditë më parë nga autoritetet e Maqedonisë së Veriut dhe dyshohen si të përfshirë në tentativën e trafikimit ndërkombëtar të lëndës narkotike, të kryer në kuadër të grupit të strukturuar kriminal.
Nga pamjet që shpërndau Policia e Shtetit në atë kohë, droga ishte e grupuar në pako me kode të ndryshme. Ato përbëheshin nga 7 simbole dhe mbishkrime, që përfaqësojnë porositësit e saj.
Pakot ishin kamufluar nën kodet e “Chicago Bulls” – logo e ekipit profesionist amerikan të basketbollit, me seli në Çikago, logo e Klubit të Futbollit “Paris Saint-Germain”, simboli i kokës së një tigri, logo e “Christian Dior”, një shtëpi franceze luksoze e modës dhe 3 simbole të tjera.
Policia njoftoi në atë kohë se droga u sekuestrua nga puna rutinë e Task-Forcës së ngritur në port, e përbërë nga Policia Kufitare Durrës, Policia Kriminale e Drejtorisë së Policisë Durrës dhe doganës.
Autoritetet gjatë viteve 2021 dhe 2022 goditën disa raste të tentativës për të futur në Shqipëri lëndë narkotike të llojit kokainë, e cila e kishte kryesisht origjinën nga vendet e Amerikës Latine dhe më së shumti u gjetën në kontejnerët që transportonin banane.
