Bashkia e Pogradecit numëron 73 mijë votues të regjistruar, nga të cilët, më pak se gjysma jetojnë në qytetin e Pogradecit ndërsa pjesa tjetër i përkasin ish-komunave. Në zgjedhjet e 14 majit, kryebashkiaku aktual Ilir Xhakolli, një ekonomist që ka punuar si doganier, kërkon një mandat të dytë përballë dy kandidatëve, Zini Tollozhinës, një sipërmarrës vendës me aktivitet në industrinë ushqimore, i cili garon për Koalicionin Bashkë Fitojmë, dhe Rezart Larakut, një kandidati të partisë Lëvizja e Re.
Bashkia e Pogradecit përbëhet nga qyteti i Pogradecit dhe shtatë ish-komunave, Udënisht, Buçimas, Çërrave, Dardhas, Trebinjë, Proptisht dhe Velçan.
Në zgjedhjet e vitit 2007, 2011 dhe 2015, kandidatët e Partisë Demokratike kanë pasur avantazh kundrejt socialistëve, të cilët kanë qeverisur bashkinë e qytetit me Artan Shkëmbin nga viti 2007 deri në vitin 2015. Socialistët e humbën bashkinë kur kandidati demokrat Eduart Kapri fitoi kundër kandidates së të majtës, Diana Mile.
Në zgjedhjet parlamentare të vitit 2021, socialistët fituan vetëm 700 vota më shumë se sa kundërshtarët e tyre, PD dhe LSI, ndërsa rreth 10% e votave iu dhanë partive të vogla. Në këto zgjedhje, socialistët patën rezultat më të mirë në qytetin e Pogradecit, ku fituan 53% të votave dhe rezultat më të keq në ish-komuna.
Popullsia votuese në Pogradec është rritur me 6 mijë vetë që nga viti 2021 ndërsa numri i votave të hedhura ka rënë me gati 3 mijë. Mes viteve 2011 dhe 2021, më shumë votues i kanë humbur kandidatëve të së djathtës se sa socialistëve. Pjesëmarrja në përqindje është në Pogradec zakonisht më e lartë se sa në rang kombëtar. Në zgjedhjet e vitit 2021 pjesëmarrja ishte 48% nga 46 që ishte në nivel kombëtar.
Bashkia e Pogradecit shtrihet në 549 kilometra katrore në një terren të thyer malor që fillon nga brigjet e liqenit të Pogradecit dhe ngjitet në malet e Mokrës deri në nivelin 1789 metra mbi det. Ekonomia e zonës mbështetet në një sezon turistik jo shumë të gjatë në brigjet e liqenit dhe një bazë e vogël industriale. Të dhënat e Institutit të Statistikave tregojnë se në këtë bashki numërohen 2669 sipërmarrje, përfshirë bizneset e vogla për vetëpunësim. Vetë bashkia e Pogradecit numëron 680 të punësuar.
