Prokuroria e Posame Kundër Korrupsionit dhe Krimit të Organizuar, SPAK njoftoi të enjten më 4 korrik caktimin e një mase të dytë sigurimi “Arrest në burg” ndaj Jorgo Goros, ish-kryetarit të Bashkisë së Himarës. Kjo masë e dytë e sigurimit personal ndaj tij është caktuar për veprën penale “Shpërdorimi i detyrës”, pasi dyshohet se Goro, në cilësinë e kryetarit të Bashkisë Himarë, ka kryer veprime dhe mosveprime në kundërshtim me ligjin gjatë procesit të trajtimit të një kërkese të paraqitur nga kryetari aktual i komanduar i të njëjtës njësie vendore, Arqile Bollano, prej nga ky i fundit ka përfituar mbi katër dynymë tokë në mënyrë të paligjshme.
Aktualisht Goro gjendet në burg, pasi akuzohet nga SPAK se në bashkëpunim me vartës dhe zyrtarë të Kadastrës, ka kaluar sipërfaqe toke në pronësi të shtetit në bregdet në favor të privatëve përmes dokumenteve të falsifikuara. Kjo pasuri është aktualisht në pronësi të një kompanie të Artan Gaçit, bashkëshortit të deputetes socialiste Olta Xhaçka, i cili ka fituar edhe statusin e investitorit strategjik.
Në njoftimin e SPAK të shpërndarë për mediet të enjten, thuhet se hetimi ku bazohet masa e dytë ndaj Goros është regjistruar për veprat penale “Falsifikimi i dokumenteve” dhe “Shpërdorimi i detyrës”, mbi aktet e dërguara për kompetencë nga Prokuroria e Vlorës.
SPAK sqaron se Bollano ka përfituar në gusht të vitit 2016 një sipërfaqe toke prej 4263 metrash sipas një Akti të Marrjes së Tokës në Pronësi. Sipas SPAK, kjo sipërfaqe toke është përfituar në mënyrë të paligjshme, pasi Bollani kishte përfituar më parë një sipërfaqe prej 7700 metra katrorë tokë në bazë të ligjit 7501.
