Gjykata Kushtetuese, Gjykata e Lartë, Prokuroria e Posaçme, Prokuroria e Përgjithshme, Këshilli i Lartë Gjyqësor dhe Inspektori i Lartë i Drejtësisë njoftuan njëri pas tjetrit të ditët e para të tetorit se nuk do të marrin pjesë në mënyrë të drejtpërdrejtë me ekspertë në këtë komision.
Në letrat dërguar komisionit, organet e drejtësisë argumentuan pavarësinë e tyre nga pushteti legjislativ dhe ofruan ‘pika kontakti’ për të komunikuar me komisionin në vijim.
Xhafaj tha të hënën për mediat se nuk i lexonte si “refuzim’ përgjigjet e ardhura nga këto institucioneve, duke sugjeruar se ato do të përfshiheshin në proces në një mënyrë a në një tjetër, duke iu referuar raportimeve të bëra prej tyre në Komisionin e Ligjeve dhe propozimeve ligjore të dorëzuara në këtë komision.
“Ata do të përfshihen në këtë proces me propozimet që kanë, me dokumentet e tyre”- tha ai duke shtuar se draft-dokumentet që do të prodhojë komisioni do të konsultohen dhe me vetë institucionet e drejtësisë.
Xhafa aludoi se do të ishte e shqetësuese nëse institucionet e drejtësisë do të kishin vendosur bashkarisht për të mbajtur një qëndrim ndaj komisionit.
“Nëse ato janë bërë bashkë do të thotë që ato janë koorporatë dhe ky do të ishte një problem i madh,” tha ai, por shtoi se nuk mendonte se bëhej fjalë për një gjë të tillë pasi përgjigjet ishin të ndryshme dhe ishin shenjë e pavarësisë së tyre.
Gjithsesi, Xhafaj këmbënguli se gjyqtarët e prokurorët do të ishin pjesë e konsultimit të dokumenteve që do të prodhonte komisioni.
“Sistemi nuk janë drejtuesit, ata janë të përkohshëm. Do t’u themi gjyqtarëve dhe prokurorëve, cilat janë qëndrimet qëndrimet tuaja”,- tha ai.
Komisioni u ngrit mbi bazën e një rezolute të iniciuar nga kryeministri Edi Rama dhe e nisi punën në mënyrë të njënashme pasi opozita refuzoi të merrte pjesë.
Por, në tentativë për t’i dhënë karakter gjithpërfshirës punës së komisionit kreu i tij tha se janë planifikuar ‘forume dialogu qytetar’ në nivel vendor dhe në universitete, si dhe 12 tryeza me grupe interesi, grupe biznesi, pedagogë e ekspertë të fushave të ndryshme.
