Këshilli i Lartë i Prokurorisë, KLP vendosi të enjten më 30 janar caktimin e masës disiplinore “vërejtje publike” ndaj drejtuesit të Prokurorisë së Sarandës, Kledian Llaho, ndaj të cilit filloi procedimi disiplinor me kërkesë të Inspektorit të Lartë të Drejtësisë, ILD lidhur me zvarritje të hetimeve në një çështje dhe moszbatim të detyrave të lëna nga gjykata. Përfaqësuesit e ILD-së pretenduan në seancën e 10 janarit se Llaho kishte bërë shkelje të rëndë disiplinore dhe kërkuan të caktohet masa e uljes së pagës në masën 40% për një periudhë njëvjeçare, por KLP vendosi t’i japë vërejtje publike. Llaho i cilësoi të pabazuara konstatimet dhe kërkimet e ILD-së dhe procesin disiplinor të ngritur ndaj tij për zvarritje e hetimeve, si fyes.
Të hënën, ILD kërkoi një masë disiplinore të dytë ndaj Llahos, që lidhet me mospërmbushje të detyrimeve të përcaktuara në ligj në cilësinë e drejtuesit, si dhe me shkelje të përsëritura të rregullave të sjelljes në marrëdhëniet me magjistratët e tjerë. Llaho kërkoi shtyrjen e seancës për procedimin e dytë disiplinor me argumentin se donte të përfaqësohej nga një avokat, kërkesë që u miratua prej KLP-së.
Prokurori Kledian Llaho u pezullua nga detyra dy javë më parë me vendim të Gjykatës së Posaçme për Korrupsionin dhe Krimin e Organizuar pasi dyshohet se ka kryer veprime me natyrë korruptive, duke kërkuar përftime të parregullta materiale, nga të cilat do të përfitonte në mënyrë të drejtpërdrejtë vjehrri i tij.
Kledian Llaho u konfirmua me shumicë votash më 22 dhjetor 2022 nga Komisioni i Pavarur i Kualifikimit, KPK, pasi shpjegimet dhe provat e dorëzuara prej tij për balancën negative dhe gjetjet në kriterin e figurës dhe pasurisë, u gjetën bindëse nga shumica e trupës së KPK.
Vendimi i KPK u ankimua pranë Kolegjit të Posaçëm të Apelimit nga Komisioneri Publik, Florian Ballhysa, i cili kërkoi shkarkimin me argumentin se ai nuk arrin nivel të besueshëm dhe se ka cënuar besimin e publikut tek drejtësia. Çështja e Llahos nuk është shqyrtuar ende në KPA.
