Prokuroria e Posaçme kundër Korrupsionit dhe Krimit të Organizuar, SPAK njoftoi të premten më 7 mars sekuestrimin e pasurive të tjera të dy të akuzuarve si drejtues të një grupi të strukturuar kriminal, që nëpërmjet mashtrimit online përmes call-center-ave në Shqipëri dhe Itali, dyshohet se u vodhën shtetasve evropianë miliona euro në këmbim të premtimit për investime në letra me vlerë dhe kriptovaluta. Sekuestrimet janë kryer në funksion të procedimit pasuror të dy të pandehurve Jusel Mici dhe Mendim Domi, të cilët po gjykohen për mashtrim kompjuterik, krim të organizuar, fshehje e të ardhurave dhe pastrim parash. Përveç pasurive të tyre, janë vendosur nën sekuestro edhe pasuritë e personave të lidhur.
Në kuadër të hetimit pasuror, janë vendosur nën sekuestro 31 pasuri. Në Tiranë janë sekuestruar pesë apartamente me sipërfaqe totale 562 m2; tetë ngastra tokë arë me sipërfaqe totale 23 mijë e 807 m2; një njësi shërbimi me sipërfaqe 442 m2; gjashtë garazhe me sipërfaqe totale rreth 92 m2; 40% të kuotave të shoqërisë tregtare “Super Foods”; tre automjete dhe tre llogari bankare me vlerë rreth 1.6 milionë lekë. Po ashtu, janë sekuestruar edhe dy vila në Gjirin e Lalëzit në Durrës.
Nga hetimet e SPAK rezultoi se të pandehurit u propozonin viktimave të derdhnin shuma të konsiderueshme parash nëpërmjet transferimeve on line në llogaritë rrjedhëse të huaja të kompanive fiktive. Me marrjen e menjëhershme të këtyre shumave, ato zhdukeshin duke u konvertuar kryesisht në kriptovaluta. Nga aktet e adminsitruara gjatë hetimit penal, janë ngritur dyshime se numri i të dëmtuarve është shumë herë më i madh nga ata që kanë kryer kallëzim për këtë skemë mashtrimi. Duke iu referuar kallëzimeve, dëmi ekonomik i provuar në dëm të qytetarëve evropianë arrin në vlerën 3 milionë euro.
