Prokuroria e Fierit njoftoi të martën se kishte regjistruar një procedim penal për veprën e “korrupsionit aktiv në zgjedhje” dhe ia kishte përcjellë më pas Prokurorisë së Posaçme për kompetencë.
Rasti lidhet me arrestimin e shtetasit me iniciale M. L në Lushnje pas dyshimeve se kishte marrë një kartë identiteti kundrejt premtimit të blerjes së votës me një shumë prej 50 mijë lekësh, me qëllim favorizimin e një subjekti politik në zgjedhjet parlamentare të 11 majit.
Sipas prokurorisë, procedimi ka filluar bazuar në informacionet e marra nga Komisiariati i Policisë Lushnjë dhe në vijim janë përdorur metoda proaktive të hetimit, duke konkluduar me arrestimin në flagrancë të të dyshuarit.
Pas arrestimit të personit të dyshuar të hënën, shtabi elektoral i Partisë Demokratike në Qarkun e Fierit i cilësoi akuzat si sajesa të turpshme.
Nëpërmjet një reagimi, shtabi elektoral i PD-së u shpreh se distancoheshin nga çdo krim elektoral, duke shtuar se janë në krye të betejës kundër shkeljeve të ligjit në zgjedhje. “SPAK duhet të hetojë menjëherë rastin dhe të vendosë para përgjegjësisë cilindo që ka shkelur ligjin”, shkruhej në reagim.
Lidhur me këtë rast, reagoi të hënën edhe kryetari i Partisë Demokratike, Sali Berisha. Duke e krahasuar me rastin e të zgjedhurit si kryetar i Bashkisë së Himarës në zgjedhjet vendore të 14 majit 2023, Fredi Beleri, i cili u arrestua për blerje votash, Berisha deklaroi se ishin simulime dhe se gjithçka ishte e organizuar nga pala kundërshtare. Ai theksoi ndër të tjera, se sapo të mësonte emrin e personit që kishte marrë pjesë, do të përjashtohet në mënyrë përfundimtare nga Partia Demokratike.
