Prokuroria e Elbasanit njoftoi të martën fillimin e hetimeve kryesisht për një denoncim publik të Sekretarit të Përgjithshëm të Partisë Demokratike, Flamur Noka, i cili në një një postim në rrjetet sociale shkroi se Suel Çela, një anëtar i krimit të organizuar në Elbasan, e ka kthyer burgun e Peqinit në një shtab zgjedhor për një kandidate të Partisë Socialiste.
Sipas Nokës, disa punonjës policie që shërbejnë pranë këtij burgu, kanë zhvilluar takim për t’u përfshirë në fushatë.
Prokuroria e Elbasanit thotë se regjistrimi u krye pas marrjes dijeni nga burime të hapura në internet për një denoncim publik në rrjetet sociale nga përfaqësuesi i një subjekti politik, lidhur me përfshirjen e mundshme të disa punonjësve të IEVP Peqin në fushatë zgjedhore në mbështetje të një kandidati për deputet në zgjedhjet e 11 majit 2025. Procedimi penal është regjistruar për veprën penale “Shpërdorimi i autoritetit policor”.
Për kryerjen e hetimeve, prokuroria bën me dije se ka ngritur një grup të posaçëm hetimor të përbërë nga prokurori i çështjes dhe tre oficerë të policisë gjyqësore, nga të cilët po kryhen verifikimet dhe veprimet e para hetimore me karakter të ngutshëm, si pyetje të personave me dijeni për veprën penale, këqyrje pamjesh filmike, sekuestrime të provave materiale si aparate celulare, DVR, etj.
