Të dielën e 11 majit, shqiptarët votuan për zgjedhjet parlamentare. Korridoret e shkollave apo palestrave të përshtatura në qëndra votimi për qytetin e Tiranës ishin të tejmbushura me votues kryesisht gjatë orëve të paradites, pasuar nga një rënie e fluksit të votuesve gjatë orëve të mesditës dhe pasdites.
Pavarësisht se fillimisht u duk se pjesëmarrja ishte në nivele optimale, rezultati përfundimtar tregoi se vetëm 42.21% e shqiptarëve me të drejtë vote iu drejtuan kutive të votimit.
Në qendrat më të mëdha të votimit në kryeqytet, qytetarët endeshin korridoreve duke kërkuar dhomën e tyre të votimit, duke nxjerrë në pah edhe një herë mungesën e orientimit parazgjedhor.
“Nuk po dimë nga të shkojmë. Nuk ka njeri të na orientojë”, i tha BIRN një grua e moshuar e cila fshinte djersët me shami teksa kërkonte qendrën e saj të votimit në Pallatin e Sportit “Asllan Rusi” në Tiranë.
Edhe këtë vit, votimi elektronik nëpërmjet pajisjes PEVN u aplikua vetëm në njësinë bashkiake nr.10 në Tiranë, si edhe në Vorë.
Kryesisht të moshuarit hasën vështirësi me përdorimin e pajisjes elektronike, duke kërkuar asistencën e operatorëve të PEVN. Ata që e kishin të pamundur të përdornin pajisjen gjithashtu lejoheshin të asistoheshin nga një shoqërues apo familjar i cili duhej të ishte akoma në pritje për të votuar.
Procesi i numërimit të votave pati jo pak incidente të kontestimit nga vëzhguesit e partive politike në qendrat e numërimit.
Rezultatet e deritanishme tregojnë se Partia Socialiste fitoi një shumicë dërrmuese në parlamentin e ardhshëm me 83 mandate, ndjekur nga Aleanca për Shqipërinë Madhështore me 50 mandate dhe Partia Socialdemokrate e Tom Doshit me 3 mandate. Mes partive të reja, “Mundësia” e Agron Shehajt mori 2 mandate, ndërsa Nisma Shqipëria Bëhet dhe Lëvizja Bashkë ndajnë nga një mandat.
date, Nisma Shqipëria Bëhet dhe Lëvizja Bashkë secila respektivisht me nga 1 mandat.
