Policia e Tiranës njoftoi të enjten rezultatet e një hetimi disamujor ndaj veprimtarisë që ushtrohej në spitalin privat “International Medicare” me vendodhje në vendin e quajtur Zogu i Zi në Tiranë, prej nga dyshohet se shërbimet kryheshin me produkte të ndaluara për përdorim, të kontrabanduara; se ishte kryer evazion fiskal me vlerë mbi 1 milion euro gjatë periudhës 2024-2025; si dhe se aty punonin pesë shtetas të pasiguruar.
Sipas policisë, gjatë kontrolleve të ushtruara janë sekuestruar 100 blloqe me mandate të pafiskalizuara, 27 lloje medikamentesh të dyshuara se ishin të skaduara dhe 6 njësi kompjuterike.
Në njoftimin për shtyp, policia akuzon si përgjegjës bashkëaksionerët e subjektit, shtetasi turk Bilal Kara dhe shtetasja shqiptare G.A, 32 vjeçe, të cilët janë shpallur në kërkim. Ndërkohë, është arrestuar administratori i spitalit, Edmond Zaja 62 vjeç.
“…U konstatua se nëpërmjet lëshimit të faturave të pafiskalizuara, ishte kryer evazion fiskal me vlerë mbi 1 000 000 euro. Gjithashtu, në spital përdoreshin medikamente të dyshuara të kontrabanduara, të ndaluara për përdorim, nga autoritetet kompetente, si dhe ishin punësuar pa u siguruar, 5 shtetas”, citohet në njoftimin e policisë.
Policia njoftoi gjithashtu se kishte vendosur bllokimin e këtij aktiviteti privat.
