Gjykata e Posaçme vendosi të hënën më 3 nëntor që të deklarojë fajtor ish-deputetin e Partisë Socialiste, Jurgis Çyrbja dhe ta dënojë atë me 3 vjet burg për veprat penale të korrupsionit në zgjedhje, përkrahjes së krimit dhe nxjerrjes së sekretit shtetëror. Në aplikim të gjykimit të shkurtuar, Çyrbja do të vuajë 2 vjet burg.
Gjykata vendosi gjithashtu dënimin e Altin Hajrit, një personazh i dyshuar për krim të organizuar me 3 vjet burg, ndërsa për të pandehurin tjetër, Ahmet Masha u caktua një dënim prej 2.6 vitesh burg.
Vendimi u shpall nga trupa gjykuese e kryesuar nga Etleva Deda dhe me anëtare Flojera Davidhin dhe Irena Gjokën.
Sipas prokurorit Adnan Xholi, ish-deputeti Jurgis Çyrbja kishte konsumuar në tetë raste veprën penale tregtim i sekretit shtetëror, në pesë raste veprën penale të përkrahjes së autorit të krimit si dhe korrupsion zgjedhor në mars të vitit 2021. Por pavarësisht episodeve të shumta, Xholi kërkoi dënimin përfundimtar të Çyrbjes me 2 vjet burg në aplikim të gjykimit të shkurtuar.
E njëjta masë dënimi u kërkua dhe për të pandehurin Altin Hajri, i akuzuar për veprat penale “Korrupsioni pasiv në zgjedhje” dhe “Tregimi i sekretit shtetëror nga shtetasit”, kryer në bashkëpunim në një rast. Për të pandehurin tjetër, Ahmet Masha u kërkua dënimi me 2 vjet e 6 muaj burgim për veprat penale “Tregimi i sekretit shtetëror nga shtetasit”, kryer në bashkëpunim në një rast dhe “Përkrahja e autorit të krimit”, kryer në bashkëpunim. Në aplikim të gjykimit të shkurtuar u kërkua dënimi i tij me 1 vit e 8 muaj heqje lirie.
Të pandehurit nuk ishin në seancë, por përfaqësuesit e tyre ligjorë kundërshtuan si të pabazuara kërkimet e prokurorisë dhe kërkuan pafajësi. Sipas tyre, prokuroria nuk ka sjellë asnjë provë të re, përpos të dhënave të SKY ECC.
Avokati i të pandehurit Altin Hajri argumentoi se nuk ka prova që të vërtetojnë se i mbrojturi prej tij ka kërkuar favore përkundrejt mbështetjes në zgjedhje. Sipas tij, duhej që nga SPAK të ishte verifikuar raporti mes Hajrit dhe Çyrbjas, nëse raporti miqësor mes tyre kishte qenë i mëparshëm, apo ishte krijuar për shkak të fushatës elektorale. Ai nënvizoi se mbështetja ka qenë si e çdo qytetari kundrejt një kandidati për deputet. Po ashtu, kundërshtoi dhe akuzën për tregim të sekretit shtetëror, duke pretenduar se Hajri nuk ka pasur dijeni nëse informacioni përbënte sekret shtetëror. “Nuk mund të ngarkohet me përgjegjësi kur ai nuk e dinte se ishte sekret shtetëror,” pretendoi avokati.
Avokati i Çyrbjas, Ilir Murati paraqiti në mënyrë të detajuar konkluzionet përfundimtare, duke u ndaluar në çdo episod për të cilin akuzohet i mbrojturi prej tij. Në fillim solli në vëmendje se nuk ka asnjë provë tjetër të prokurorisë për t’u kryqëzuar me ato të aplikacioneve SKY ECC. Sipas tij, ka disa persona me të njëjtin emër dhe mbiemër si i përfaqësuari prej tij dhe për rrjedhojë nuk mund të konkludohet se kush i ka disponuar ato llogari në aplikacione. Murati kundërshtoi dhe akuzat e tjera. Sipas tij, që të dhënat e një akti të jenë sekret shtetëror, duhet të jetë dokument me shënimin “I klasifikuar”. Edhe Murati kërkoi deklarimin e pafajshëm të Çyrbjas. Edhe përfaqësuesi i të pandehurit Masha kërkoi pafajësi.
Pasi u tërhoq, trupi gjykues i gjeti të drejta kërkimet përfundimtare të SPAK.
Të pandehurit Jurgis Çyrbja dhe Ahmet Masha u arrestuan në tetor të vitit të kaluar, duke zbuluar lidhje të thella dhe bashkëjetesë mes krimit të organizuar dhe politikës, si dhe ndikimin e tyre në procesin zgjedhor, duke deformuar votën e lirë dhe sistemin demokratik të vendit. Sipas hetimeve, në këmbim të votave dhe mbështetjes, Çyrbja ka përdorur funksionin e tij si deputet për të siguruar të dhëna sekrete nga policia, të cilat ua vinte në dispozicion anëtarëve të grupeve kriminale.
