Sipas konsesusit politik të përkthyer në 116 vota, Ilirjana Nano u rizgjodh kryetare e Komisionit Rregullator.
Në trupën e anëtarëve u votua me 111 vota pro ish- kryetari i këtij institucioni, Arben Ristani, i cili ka mbajtur detyrën e kreut të KQZ-së në vitet 2009-2012 gjatë qeverisjes së Partisë Demokratike. Ristani pati më pas një karrierë politike në këtë parti si deputet dhe sekretar I përgjithshëm i saj.
Me konsensus u votuan dhe 3 anëtarët e tjerë të këtij organi rregullator të KQZ-së, Dritan Çaka dhe Helga Vukaj, të cilët u rizgjodhën në detyrë dhe Bledar Skënderi, i cili ka shërbyer me herët si anëtar i KQZ-së para se ky institucion të riformatohej.
Komisioni Rregullator ka 5 anëtarë dhe si rregull 3 vijnë si kandidatë të mazhorancës në pushtet dhe dy nga opozita.
Mandati i anëtareve të Rregullatorit përfundoi në muajin tetor dhe Kuvendi hapi hapi garën për zëvendësimin e tyre.
Komisioni Rregullator është organi I KQZ-së që ka në kompetencë miratimin e akteve me karakter normativ për proceset zgjedhore.
Bazuar në Kodin Zgjedhor, ky organ i KQZ-së, ndër të tjera ka kompetencë të miratojë rregulla të detajuara për organizimin dhe administrimin e zgjedhjeve dhe referendumeve, rregullat dhe udhëzimet për njehsimin dhe përmirësimin e praktikave zgjedhore, si dhe për veprimtarinë e institucioneve publike në shërbim të zgjedhjeve.
