SPAK njoftoi të enjten më 15 janar përfundimin e hetimeve për sulmin kibernetik të kryer ndaj kësaj prokurorie në mars të vitit të kaluar, kur të dhëna të disa çështjeve ndaj zyrtarëve të nivelit të lartë që ishin nën hetim, u kopjuan përmes hakerimit dhe u shpërndanë dhjetra personave, duke dëmtuar ecurinë e hetimeve.
SPAK ka gjetur si përgjegjës të këtij sulmi kibernetik të paprecedentë vetëm tre persona, ish-drejtorin e Përgjithshëm të Burgjeve, Agim Ismaili, ish-drejtorin e paraburgimit të Vlorës, Zambak Gjoni dhe ish-punonjësin e Inspektoratit të Mbrojtjes së Territorit, Arnold Rrokaj. Ismaili që akuzohet se kërkoi vijimin e hakerimit për persona të ndryshëm, u hetua në gjendje të lirë, ndërsa dy të tjerët u arrestuan.
Në mënyrë të përmbledhur, SPAK bëri me dije se ka qenë i pandehuri Arnold Rrokaj që ka aksesuar në mënyrë të paautorizuar materiale hetimore, një pjesë e të cilave u dërguan në mënyrë të paligjshme tek dy të akuzuarit e tjerë, Zambak Gjoni dhe Agim Ismaili. Këta të fundit i shpërndanë të dhënat e dosjeve tek persona të tretë.
Sipas SPAK, pasi i pandehuri Agim Ismaili është njohur me përmbajtjen e të dhënave, jo vetëm i shpërndau ato më tej, por edhe kërkoi në mënyrë të vetëdijshme thellimin e përgjimit të paligjshëm të sistemeve të Prokurorisë së Posaçme, duke kërkuar gjetjen e të dhënave për persona të ndryshëm.
Të tre të pandehurit akuzohen se kanë kryer përgjim të paligjshëm të të dhënave kompjuterike në formën e grupit të strukturuar kriminal. Ndërkohë, Arnold Rrokaj që dyshohet se ka realizuar hakerimin, akuzohet edhe për veprën penale “Hyrja e paautorizuar kompjuterike”.
SPAK, kërkon kalimin për gjykim të çështjes penale në ngarkim të tre të pandehurve.
Sistemi kompjuterik i SPAK u sulmua më 12 mars të vitit 2025 dhe u zbulua disa ditë më vonë. SPAK bëri me dije atëherë se ishte vënë në shënjestër të një ndërhyrje të paligjshme të adresave të email-ve të prokurorëve të posaçëm. Sipas njoftimit të atëhershëm të SPAK, u tentua të ndërhyhet edhe në email-in e ish-drejtuesit, Altin Dumani.
