Kryeministri Edi Rama lëshoi të martën një batare akuzash ndaj gjyqtarëve, duke përdorur terma si “marrëbabëzi”, “skandal” dhe “turp kombëtar”, në një përpjekje të dukshme për të diktuar vendimmarrjen e Gjykatës Kushtetuese lidhur me kërkesën e dy shoqatave për të shpallur antikushtetues nene të ligjit që lidh pagën e magjistratëve me atë të Presidentit të Republikës.
Në momentin që Gjykata po zhvillonte seancën, e cila nuk u transmetua për publikun për shkak të “defekteve teknike”, Rama ndërhyri publikisht duke sulmuar legjitimitetin e kërkesës.
“Sot Gjykata Kushtetuese po zhvillon (fatkeqësisht pa transmetim direkt për shkaqe teknike) farsën më të shëmtuar të imagjinueshme, e cila i është imponuar nga dy shoqata gjyqtarësh, të cilët duan të rrisin rrogat e tyre me gjyq”, shkroi kryeministri në X.
Rama pretendoi se gjyqtarët janë tashmë kategoria më e paguar në vend falë mbështetjes së mazhorancës për Reformën në Drejtësi, po tentojnë të uzurpojnë kompetencat e parlamentit dhe qeverisë për të “thyer piramidën shtetërore të pagave”.
“Tani këta duan që në përjetësi t’u jepet e drejta ta rrisin vetë rrogën,” deklaroi Rama, duke e cilësuar kërkesën e shoqatave si një “skandal logjik, moral, ligjor dhe kushtetues”.
Padia në Kushtetuese është kundër një ligji të miratuar në vitin 2023 nga Kuvendi për caktimin e pagës referencë për magjistratët. Ligji e lidhi pagën e magjistratëve me atë të Presidentit të Republikës. Ky ndryshim solli rritje të pagave të magjistratëve në atë kohë, siç parashikohej në ligjet për reformën në drejtësi. Në të njëjtën kohë u miratuan edhe ndryshimet në pagat e administratës civile, të cilat u rritën disa herë.
Gjyqtarët, paga referuese e të cilëve lidhej tani me atë të presidentit, nuk përfituan nga kjo rritje pagash. Për Unionin e Gjyqtarëve, këto ndryshime bien ndesh me nenin 138 të Kushtetutës.
Gjykata Kushtetuese që u mblodh të martën në seancë, nuk ka dalë ende me një vendim në lidhje me çështjen çka e bën sulmin e kryeministrit të lexohest si një përpjekje për të diktuar gjykatën.
Kjo nuk është hera e parë që kryeministri targeton gjyqtarët në lidhje me padinë për pagat dhe synon t’i imponohet Kushtetueses. Duke e paracaktuar çdo vendim në favor të gjyqtarëve si një “turp kombëtar”, Rama praktikisht e vendos gjykatën nën presion politik.
Në retorikën e tij, Rama përdori edhe strategjinë e përçarjes brenda sistemit të drejtësisë. Ai u kujdes të veçonte dhe të lavdëronte Prokurorinë e Posaçme (SPAK) për mospjesëmarrje në këtë padi, duke e përdorur këtë si argument për të delegjitimuar kërkesat e pjesës tjetër të korpusit gjyqësor. “Respekte për SPAK-un që nuk iu bashkua kësaj marrëbabëzie,” theksoi Rama.
Sulmi i rradhës, pas një serie të ngjashme herë për individë, herë për institucione dhe herë të tjera mbi të gjithë trupën e magjistratëve, vjen pak ditë para se Gjykata Kushtetuese të shqyrtojë kërkesën e Ramës mbi vendimin e Gjykatës së Posaçme për pezullimin e zëvendëskryeministres Belinda Balluku.
Në të njëjtën kohë shumica e kontrolluar nga Rama mban në sirtarë një kërkesë të dytë të SPAK për imunitetin e Ballukut duke e lidhur atë me vendimin e Gjykatës Kushtetuese pavarësisht se kërkesat janë të ndryshme.
