Një punonjës i Operatorit të Shpërndarjes së Energjisë Elektrike në Lezhë humbi jetën të enjten, pasi ra në kontakt me energjinë elektrike gjatë punës për riparimin e një defekti në zonën e Rrilës. Ngjarja ndodhi mëngjesin e së enjtes, ndërsa viktima u identifikua si Mark Prenga, 27 vjeç, banues në fshatin Pllanë.
Policia bëri me dije se elektricisti ishte njoftuar nga banorët për mungesë të energjisë elektrike në zonën e Rrilës dhe, së bashku me dy punonjës të tjerë, ka shkuar për riparimin e defektit në afërsi të nënstacionit elektrik. “Nga veprimet e para hetimore rezulton se, sapo ka hipur në shtyllë, 27-vjeçari ka rënë në kontakt me energjinë elektrike, pasi njëra nga linjat paralele kishte ende rrymë elektrike”, njoftoi policia.
Policia bëri me dije se po verifikon nëse janë respektuar rregullat e sigurisë në punë dhe protokollet e përcaktuara.
Rrjeti i amortizuar elektrik në fshatrat e Lezhës, përveçse shkakton ndërprerje të herëpashershme të energjisë, është kthyer në një rrezik serioz për jetën e qytetarëve dhe vetë punonjësve të OSHEE-së. Mark Prenga është viktima e tretë brenda pak muajsh; gjatë vitit të kaluar humbën jetën dy qytetare, një vajzë e re dhe një grua, si pasojë e kontaktit me energjinë elektrike, për shkak të shkëputjes dhe rënies së linjave në tokë.
Energjetika është një nga tre sektorët me më shumë viktima në punë në Shqipëri, menjëherë pas ndërtimit dhe minierave. Ndërkohë, më herët BIRN ka zbuluar se kompania publike OSHEE është gjetur fajtore nga gjykata dhe është urdhëruar të paguajë dëmshpërblime në dhjetëra milionë lekë për aksidentet në punë të punonjësve të saj.
