Historia e zgjedhjeve lokale shqiptare, zbuloni 61 analizat e BIRN

Të dhënat e katër palë zgjedhjeve për pushtetin vendor në vend, të analizuara nga BIRN, mundësojnë shikimin e ecurisë historike të zgjedhjeve bashkiake të shprehura në analiza të të dhënave dhe në informacion grafik. Analizat, të cilat mund të aksesohen në linqet më poshtë, synojnë të informojnë lexuesit mbi kandidatët aktualë në zgjedhjet e së dielës si dhe rezultatin që partitë përkatëse kanë pasur në zgjedhjet e shkuara.
Të dhënat statistikore janë grumbulluar për zgjedhjet e pushtetit vendor në vitin 2007, 2011, 2015 dhe 2019. Shqiptarët kanë votuar ndryshe në zgjedhjet e vitit 2007 dhe 2011, kur vendi ishte i ndarë në 374 njësi administrative, bashki dhe komuna, si dhe pas vitit 2015, kur vendi u nda në 61 bashki.
Në mënyrë që të dhënat të bëheshin të krahasueshme, për vitet 2007 dhe 2011 u mblodhën rezultatet e arritura nga kandidatët e secilës palë në të gjitha njësitë përbërëse të bashkisë së re. Fjala vjen, bashkia Sarandë përbëhet nga qyteti i Sarandës dhe ish-komuna Ksamil. Rezultatet e paraqitura në grafik për vitet 2007 dhe 2011, pasqyrojnë votat e marra nga kandidatët për kryetarë të dy grupimeve të mëdha, të mbledhura mes Partisë Demokratike dhe Partisë Socialiste.

Në shikimin e të dhënave statistikore, lexuesi rekomandohet të ketë parasysh se palët politike kanë ndryshuar përbërje. Në rastin më të dukshëm, partia Lëvizja Socialiste për Integrim, e cila është partia e tretë më e madhe në vend, ka garuar në aleanca vendore me Partinë Socialiste në vitin 2007, në aleancë me Partinë Demokratike në vitin 2011 dhe sërish në aleancë me PS-në në vitin 2015, gjë që në ndikon në rezultatin e zgjedhjeve.
Analizat tregojnë se në një numër të lartë bashkish, gara është aktualisht mes kryebashkiakëve dhe ish-kryebashkiakëve, ose ish-kryekomunarëve. Në disa bashki kryebashkiakët nuk kanë ndryshuar tashmë prej më shumë se një dekade ndërsa kryebashkiaku i Maliqit është në garë për mandatin e shtatë e ai i Poliçanit, për mandatin e gjashtë.